„საქართველოს დემოკრატიული ინიციატივა“ არის დამოუკიდებელი, არასამთავრობო, არასამეწარმეო ორგანიზაცია, რომლის მიზანია ხელი შეუწყოს ქვეყნის დემოკრატიულ განვითარებასა და ევრო-ატლანტიკურ სივრცეში ინტეგრაციას, კვლევის, ანალიზისა და საგანმანათლებლო საქმიანობის განხორციელების გზით.
ორგანიზაცია მოწოდებულია დაიცვას ადამიანის უფლებები, წაახალისოს ინკლუზიური საზოგადოების ჩამოყალიბება და ტოლერანტული გარემოს განვითარება, გააძლიეროს დემოკრატიული რეფორმები და განამტკიცოს კანონის უზენაესობა, გაზარდოს სახელმწიფო ინსტიტუტების გამჭვირვალობა და ანგარიშვალდებულება. „საქართველოს დემოკრატიული ინიციატივა“ ამ მიზნებს ემსახურება მონიტორინგის, საჯარო დებატების, ფაქტებზე დაფუძნებული კვლევებისა და პოლიტიკის ანალიზის მეშვეობით.
ორგანიზაცია აერთიანებს მისი საქმიანობის ძირითად სფეროებში კვლევის, ადვოკატირებისა და მონიტორინგის დიდი გამოცდილების მქონე მაღალკვალიფიციურ პროფესიონალებს. გუნდის წევრთა ექსპერტული პოტენციალი, გამოცდილება, მიუკერძოებლობა და სანდოობა განაპირობებს „საქართველოს დემოკრატიული ინიციატივის“ წამყვან როლს საქართველოში ადამიანის უფლებებისა და დემოკრატიული განვითარების პოლიტიკის შესახებ დისკურსში.
ედუარდ მარიკაშვილი "საქართველოს დემოკრატიულ ინიციატივას" 2021 წლიდან ხელმძღვანელობს.
ედუარდ მარიკაშვილი ორგანიზაციას 2014 წლიდან შემოუერთდა და იკავებდა GDI-ს იურისტის პოზიციას. 2017 წლიდან ხელმძღვანელობდა GDI-ს იურიდიული დახმარების ცენტრს. GDI-ს გამგეობის 2023 წლის 20 იანვრის გადაწყვეტილებით ედუარდი ორგანიზაციის ხელმძღვანელად მეორე ვადით აირჩიეს.
ედუარდ მარიკაშვილს აქვს თბილისის სახელმწიფო უნივერსიტეტის მაგისტრის ხარისხი. 2019-2022 წლებში იყო თბილისის თავისუფალი უნივერსიტეტის მოწვეული ლექტორი. ამჟამად არის სამართლის დოქტორანტი და იკვლევს მედია სამართლის საკითხებს.
მარინე კაპანაძე არის GDI-ს სამოქალაქო და პოლიტიკური უფლებების პროგრამის დირექტორი.
მარინე კაპანაძე უკვე ცხრა წელია, რაც ჩართულია უფლებადაცვით საქმიანობაში და იცავს სხვადასხვა ჯგუფის (ჟურნალისტების, აქტივიტების, რელიგიური უმცირესობების, ლგბტქი ადამიანების და ა.შ.) ინტერესებს როგორც ადგილობრივ, ისე საერთაშორისო დონეზე, მათ შორის სასამართლოებში წარმომადგენლობის გზით, ხელმძღვანელობს სტრატეგიული სამართალწარმოების და თანასწორობის დაცვის მიმართულობას.
მარინეს მოპოვებული აქვს თბილისის თავისუფალი უნივერსიტეტის ბაკალავრის და კიოლნის უნივერსიტეტის მაგისტრის ხარისხი სამართალში. იგი ასევე არის კოლუმბიის უნივერსიტეტის უფლებამაცველთა პროგრამის მონაწილე და ამერიკის სახელმწიფო დეპარტამენტის პროფესიული გაცვლითი პროგრამის (PFP) კურსდამთავრებული.
ძირითადი საქმიანობის მიღმა, მარინე აქტიურადაა ჩართული საგანმანათლებლო სფეროში. ის არის გაეროს ადამიანის უფლებათა უმაღლესი კომისრის და ევროსაბჭოს ეროვნული კონსულტანტი და ადვოკატთა ასოციაციის ტრენერი. მარინე ასევე არის თავისუფალი უნივერსიტეტის და საქართველოს უნივერსიტეტის მოწვეული ლექტორი, სადაც ხელმძღვანელობს ადამიანის უფლებებთან დაკავშირებულ კურსებს. ამასთან, მარინე მონაწილეობს სხვადასხვა ახალგაზრდულ ინიციატივასა და არაფორმალურ პროექტში (ფრანკლინის აკადემია, "იდებატე!", და სხვა), რომელიც ორიენტირებულია ახალგაზრდებში კრიტიკული და ანალიტიკური აზროვნების განვითარებისაკენ.
გვანცა წულუკიძე საქართველოს დემოკრატიულ ინიციატივაში (GDI) კანონის უზენაესობის პროგრამას ხელმძღვანელობს და ჩართულია ორგანიზაციის მიერ განხორციელებულ სხვადასხვა პროექტში.
გვანცა წულუკიძე არის როტერდამის ერასმუსის უნივერსიტეტის (ნიდერლანდები, NUFFIC სტიპენდია), საერთაშორისო და ევროპული საჯარო სამართალის (LLM), კავკასიის უნივერსიტეტის საერთაშორისო საჯარო სამართლის (LLM) და თბილისის სახელმწიფო უნივერსიტეტის იურიდიული ფაკულტეტის (LLM) კურსდამთავრებული.
გვანცა წულუკიძე მუშაობდა არასამთავრობო ორგანიზაციაში, “საქართველოს რეფორმების ასოციაცია” (GRASS), სადაც მონაწილეობა მიიღო UPR-ის ჩრდილოვანი ანგარიშის მომზადებაში უმცირესობების უფლებებთან დაკავშირებით. 2008-2013 წლებში საქართველოს იუსტიციის უმაღლეს საბჭოში სამართლებრივი მრჩევლის პოზიციას იკავებდა. თავმჯდომარეობდა კოალიციას დამოუკიდებელი და გამჭვირვალე მართლმსაჯულებისთვის. მონაწილეობდა სხვადასხვა საერთაშორისო სემინარებში, კონფერენციებსა და შეხვედრებში. ბოლოს პერიოდში მონაწილეობა მიიღო პროფესიონალი სტიპენდიანტების პროგრამაში (PFP) და პროგრამის ფარგლებში ქალაქ ვაშინგტონში ადამიანის უფლებათა კამპანიასთან (HRC) მუშაობდა. მისი საექსპერტო მიმართულებები მოიცავს მართლმსაჯულების სექტორსა და კანონის უზენაესობას.
დავით ჯანდიერი "საქართველოს დემოკრატიულ ინიციატივაში" იურისტის პოზიციას იკავებს. ის ორგანიზაციას 2022 წელს შემოუერთდა და საერთაშორისო სამართალწარმოების გუნდს ხელმძღვანელობს.
დავით ჯანდიერი არის სტრასბურგის უნივერსიტეტის კურსდამთავრებული და მინიჭებული აქვს მაგისტრის წოდება ევროპულ სამართალსა და სწავლებაში. იგი არის თბილისის სახელმწიფო უნივერსიტეტის დოქტორი საერთაშორისო სამართალში. იგი არის საზოგადოებრივ საქმეთა ინსტიტუტის (ჯიპა-ს) პროფესორი.
დავით ჯანდიერი არის იურისტი, მრავალწლიანი პროფესიული გამოცდილებით საჯარო და კერძო სტრუქტურებში. 2012-2013 წლებში ეკავა საქართველოს იუსტიციის მინისტრის პირველი მოადგილის თანამდებობა. დავით ჯანდიერი ეწევა წარმატებულ საადვოკატო საქმიანობას ადამიანის უფლებათა ევროპულ სასამართლოში. იგი გახლდათ მომჩივნის ადვოკატი სტრასბურგის სასამართლოში განხილულ ცნობილ საქმეებში - „ენუქიძე და გირგვლიანი საქართველოს წინააღმდეგ“, ასევე „საუკუნის პროცესად“ წოდებულ ე.წ. „ციანიდის საქმეში“.
რაფიელ კაკაბაძე არის “საქართველოს დემოკრატიული ინიციატივის” იურისტი.
რაფიელი ორგანიზაციას 2018 წელს შემოუერთდა, ამჟამად ის GDI-ის კანონის უზენაესობის პროგრამაშია ჩართული.
რაფიელ კაკაბაძე 2015-2019 წლებში თბლისის თავისუფალი უნივერსიტეტის სამართლის სკოლაში სწავლობდა. 2021 წლიდან არის ილიას სახელმწიფო უნივერსიტეტის სამაგისტრო პროგრამის სტუდენტი. რაფიელი აქტიურად ერთვება არასამთავრობო ორგანიზაციების სხვდასხვა პროექტში, აორგანიზებს და ახორციელებს სამოქალაქო აქტივობებსა და კამპანიებს.
მარიამ ქვარიანი არის “საქართველოს დემოკრატიული ინიციატივის” იურისტი.
მარიამ ქვარიანი 2020 წელს ორგანიზაციის სტაჟირების პროგრამაში იყო ჩართული. 2021 წლიდან მუშაობას აგრძელებს კანონის უზენაესობის პროგრამაში.
მარიამმა 2020 წელს დაამთავრა თბილისის თავისუფალი უნივერსიტეტის სამართლის სკოლის ბაკალავრი. ამჟამად სწავლობს ილიას სახელმწიფო უნივერსიტეტის სამაგისტრო პროგრამაზე - პოლიტიკის მეცნიერების მიმართულებით და მონაწილეობს სხვადასხვა კონკურსში.
სალომე გომართელი საქართველოს დემოკრატიულ ინიციატივაში იურისტის პოზიციას იკავებს.
სალომე გომართელი GDI-ის პოლიტიკური და სამოქალაქო უფლებების პროგრამას 2020 წელს შემოუერთდა. ჩართულია კვლევაში, სამართალწარმოებაში, ანგარიშებისა და პროექტების მომზადებაში.
2021 წელს წარმატებით დაასრულა თბილისის თავისუფალი უნივერსიტეტის სამართლის სკოლა (დაიკავა მე-3 ადგილი თავის გამოშვებაში). სალომე არის სამართლის სხვადასხვა ეროვნული და საერთაშორისო შეჯიბრის (მათ შორის, Jessup national rounds, Jean-Pictet Competition) გამარჯვებული. მონაწილეობა აქვს ასევე მიღებული ადამიანის უფლებათა საზაფხულო სკოლებში, ტრენინგებში, კურსებსა და ვორკშოფებში. დაინტერესებულია ადამიანის უფლებათა, საერთაშორისო საჯარო და საერთაშორისო ჰუმანიტარული სამართალით.
ეკატერინე სუბელიანი არის "საქართველოს დემოკრატიული ინიციატივის" იურისტი.
ეკატერინე სუბელიანი 2020 წელს იყო სტაჟიორი GDI-ს სტრატეგიული სამართალწარმოების პროგრამაში. 2021 წლიდან მუშაობას აგრძელებს სამოქალაქო და პოლიტიკური უფლებების პროგრამაში.
ეკატერინემ დაასრულა თბილისის თავისუფალი უნივერსიტეტის საბაკალავრო პროგრამა. მონაწილეობდა არაერთ საერთაშორისო თუ ეროვნულ იმიტირებულ პროცესებსა და შეჯიბრებში, რომლებიც ორგანიზებული იყო ეუთო/ოდირის, საიას, USAID-ის, საქართველოს იუსტიციის სამინისტროს და სხვათა მიერ.
ვასილ ჟიჟიაშვილი "საქართველოს დემოკრატიულ ინიციატივაში" იურისტის პოზიციას იკავებს. 2022 წლიდან ჩართულია GDI-ს სამოქალაქო და პოლიტიკური უფლებებისა და კანონის უზენაესობის პროგრამებში.
2021 წელს ვასილ ჟიჟიაშვილმა დაამთავრა თბილისის თავისუფალი უნივერსიტეტის სამართლის სკოლა. 2019 წლიდან 2022 წლამდე მუშაობდა საქართველოს ახალგაზრდა იურისტთა ასოციაციაში საკონსტიტუციო სამართალწარომების იურისტის პოზიციაზე. ამჟამად ვასილი ასევე არის თბილისის თავისუფალი უნივერსიტეტისა და საქართველოს უნივერსიტეტის მოწევეული ლექტორი.
მარიამ ტაგანაშვილი არის "საქართველოს დემოკრატიული ინიციატივის" იურისტი.
მარიამი იყო სტაჟიორი GDI-ის კანონის უზენაესობის პროგრამაში. ამჟამად არის საერთაშორისო სამართალწარმოების გუნდის იურისტი.
მარიამ ტაგანაშვილმა დაასრულა თბილისის თავისუფალი უნივერსიტეტის საბაკალავრო პროგრამა და სწავლას აგრძელებს ილიას სახელმწიფო უნივერსიტეტში საჯარო სამართლისა და პოლიტიკის სამაგისტრო პროგრამაზე. ის მუშაობდა ადვოკატის ასისტენტად „საქართველოს ახალგაზრდა იურისტთა ასოციაციაში“ სამოქალაქო და ადმინისტრაციული სამართლის მიმართულებით. მონაწილეობდა არაერთ საერთაშორისო თუ ეროვნულ იმიტირებულ პროცესებსა თუ შეჯიბრებეში, რომლებიც ორგანიზებული იყო ეუთო/ოდირის, საიას, USAID-ის, საქართველოს იუსტიციის სამინისტროს, საქართველოს პარლამენტისა და სხვათა მიერ.
ვიკა კახიძე ორგანიზაციაში ადმინისტრაციული მენეჯერის პოზიციას იკავებს.
ვიკა კახიძე 2022 წლიდან იყო სტაჟიორი GDI-ს სამოქალაქო განათლების პროგრამაში. ამჟამად, სამოქალაქო განათლების გარდა, ორგანიზაციაში ადმინისტრაციული მიმართულებითაც არის ჩართული.
ვიკა თბილისის თავისუფალ უნივერსიტეტის მართვისა და საზოგადოებრივ მეცნიებათა საბაკალავრო პროგრამაზე სწავლობს. სამუშაო და მოხალისეობრივი გამოცდილება მიიღო ისეთ არასამთავრობო ორგანიზაციებში როგორებიცაა: „სამართლიანი არჩევნებისა და დემოკრატიის საერთაშორისო საზოგადოება“ (ISFED) , „დემოკრატიის მცველები“ (Democracy Defenders) და სხვა. ამჟამად აქტიურად მონაწილეობს სტუდენტურ პროექტებსა და სამოქალაქო აქტივობებში.
ნინო შელია არის თავისუფალი უნივერსიტეტის სამართლის სკოლის სტუდენტი. 2022 წლის სექტემბრიდან ჩართულია აშშ-ს უზენაესი სასამართლოს პრაქტიკის კვლევაში გამოხატვის თავისუფლების საკითხზე. 2022 წლის ზაფხულში ის გახდა DAAD ზაფხულის სკოლის პროგრამის სტიპენდიანტი და გაიარა სამართლის კურსი ვესტფალიის ფრიდრიხ ვილჰელმის სახელობის მიუნსტერის უნივერსიტეტში, გერმანიაში.