სამოქალაქო საზოგადოების ორგანიზაციების ერთობლივი განცხადება ანტი-SLAPP პლატფორმის დაარსების შესახებ

ჩვენ, სამოქალაქო საზოგადოების წარმომადგენლები,

• ვიზიარებთ, რა ადამიანის უფლებებისა და თავისუფლებების დაცვის მნიშვნელობას;

• ვიაზრებთ, საქართველოში გამოხატვის თავისუფლების, მედიისა და უფლებადამცველების წინაშე მდგარ საფრთხეებს;

• ვგმობთ საქართველოში მედიისა და უფლებადამცველების წინააღმდეგ არსებულ დისკრედიტაციულ კამპანიას, ჟურნალისტების მიმართ გახშირებულ ვერბალურ და ფიზიკურ თავდასხმებს და გამოხატვის თავისუფლების შეზღუდვის სხვა გამოვლინებებს;

• საყურადღებოდ მივიჩნევთ ძალაუფლების მქონე, მათ შორის პოლიტიკური თანამდებობის პირებისა და მათთან დაკავშირებული სხვა პირების მიერ ცილისწამების მოტივით დაწყებული დავების მზარდ რაოდენობას;

• ვფიქრობთ, რომ ამგვარი დავების მზარდი რაოდენობა შეიძლება მიანიშნებდეს სამოქალაქო ჩართულობის წინააღმდეგ მიმართულ სტრატეგიულ სარჩელებზე, ანუ SLAPP-ებზე (Strategic Lawsuits against Public Participation)

• SLAPP-ებად განვიხილავთ პოლიტიკური ან ფინანსური თვალსაზრისით გავლენიანი პირების მიერ აღძრულ სამართალწამოებებს  (ხშირ შემთხვევაში, ცილისწამების საფუძვლით წარმოებულ აშკარად უსაფუძვლო სარჩელებს), რომელთა მიზანიც არის არა პატივის, ღირსების ან/და საქმიანი რეპუტაციის დაცვა, არამედ უმეტესად მედიის ან/და აქტიური მოქალაქეების გაჩუმება და მათთვის ფინანსური ბარიერების შექმნაა. 

• აღვნიშნავთ, რომ  SLAPP-ებს ინდივიდუალური შემთხვევების მიღმა აქვთ „მსუსხავი ეფექტიც,“ რაც ძირს უთხრის ჯანსაღი და პლურალისტური გარემოს  ჩამოყალიბებას, რომელშიც მოქალაქეებს შეეძლებათ სამოქალაქო ინიციატივების განხორციელება;

• ვაცნობიერებთ ჩვენი, როგორც სამოქალაქო საზოგადოების ორგანიზაციების როლს ადამიანის უფლებებისა და თავისუფლებების, მათ შორის, მედიისა და გამოხატვის თავისუფლების განმტკიცების მიმართულებით;

ვაფუძნებთ ანტი-SLAPP პლატფორმას, რომლის მიზანია საერთო ძალისხმევით დავამკვიდროთ საუკეთესო ანტი-SLAPP სტანდარტები, დავიცვათ და გავაძლიეროთ მედია, უფლებადამცველები და სხვა სუბიექტები SLAPP საქმეებიდან მომდინარე საფრთხისგან, რომელიც მათ გაჩუმებას ისახავს მიზნად.

 

აღნიშნული მიზნის მიღწევას ვუზრუნველყოფთ შემდეგი გზებით:

1. საქართველოში SLAPP საქმეებთან დაკავშირებით არსებული მდგომარეობის ანალიზი,  მათი პრევენციისა და მათგან მომდინარე საფრთხეებთან გამკლავების სტრატეგიის დაგეგმვა;

2. ადგილობრივი და საერთაშორისო ადვოკატირება საქართველოში SLAPP საქმეებთან დაკავშირებით საუკეთესო გამოცდილების დანერგვისა და   მოსალოდნელი საფრთხის აღმოფხვრის მიზნით; 

3. ეროვნული და საერთაშორისო დონეზე  SLAPP ფენომენის შესახებ ინფორმაციის დაგროვება და ცოდნის გაცვლა. აქტივობები, რომელიც ხელს შეუწყობს  საზოგადოებაში, მათ შორის, პროფესიულ წრეებში SLAPP-ებთან დაკავშირებით ცოდნის ამაღლებას;

4. სასამართლოში მიმდინარე SLAPP საქმეების მონიტორინგი და SLAPP დავების სამიზნე ორგანიზაციების/პირების იურიდიული დახმარება. 

პლატფორმა ღიაა სამუშაო პროცეში მონაწილეობის მსურველი ორგანიზაციებისთვის. 

 

ანტი-SLAPP  პლატფორმა ამ დროისთვის ააერთიანებს შემდეგ ორგანიზაციებს: 

1. საქართველოს დემოკრატიული ინიციატივა 

2. საქართველოს ახალგაზრდა იურისტთა ასოციაცია

3. ადამიანის უფლებათა ცენტრი 

4. საერთაშორისო გამჭვირვალობა - საქართველო

5. ადამიანის უფლებათა სახლი თბილისი

6. უფლებები საქართველო

7. ინფორმაციის თავისუფლების განვითარების ინსტიტუტი

 

პლატფორმა 2023 წლის 29 ივნისს საქართველოში პირველად გამართულ ანტი-SLAPP კონფერენციის ფარგლებში დარსდა. კონფერენციას უმასპინძლეს GDI-იმ და ევროსაბჭოს ოფისმა საქართველოში.