2018 წლის 4 ივლისს, თბილისის საქალაქო სასამართლომ განიხილა მუსიკალური პროექტის „ბირჟა მაფიას“ წევრის, გიორგი ქებურიას სარჩელი საქართველოს პროკურატურის წინააღმდეგ, უკანონო დაკავების გამო მორალური და მატერიალური ზიანის ანაზღაურების შესახებ.
სასამართლომ დააკმაყოფილა მოსარჩელე მხარის შუამდგომლობა საქმეში მესამე პირად საქართველოს ფინანსთა სამინისტროს ჩართვის თაობაზე. საქმეზე სხდომა გაგრძელდება 2018 წლის 6 აგვისტოს.
ნარკოდანაშაულის ჩადენის ბრალდებით გიორგი ქებურია 2017 წლის 07 ივნისს დააკავეს. მან წინასწარ პატიმრობაში 4 დღე გაატარა. ქებურიას დაკავებას წინ უძღვოდა „ბირჟა მაფიის“ მუსიკალური კლიპი სადაც მუსიკოსებმა პოლიციელი გააშარჟეს. 2017 წლის 15 დეკემბერს პროკურატურამ დანაშაულის არ არსებობის საფუძვლით ქებურიას მიმართ სისხლისსამართლებრივი დევნა შეწყვიტა
გიორგი ქებურიას ინტერესებს საერთო სასამართლოებში GDI (საქართველოს დემოკრატიული ინიციატივა) წარმოადგენს.